ఆర్టిఫిషియల్ ఇంటెలిజెన్స్ (AI) సాంకేతికతను ఉపయోగించి అభివృద్ధి చెందుతున్న దేశాలు ఉత్పత్తి, ఆరోగ్యం, వ్యవసాయం మరియు ప్రజా సేవలను ఎలా మెరుగుపరుచుకోవచ్చో వివరిస్తూ ప్రపంచ బ్యాంక్ గ్రూప్ ‘వరల్డ్ డెవలప్‌మెంట్ రిపోర్ట్ 2026: ద ప్రామిస్ ఆఫ్ ఆర్టిఫిషియల్ ఇంటెలిజెన్స్’ నివేదికను విడుదల చేసింది. న్యూఢిల్లీలో జరిగిన ప్రత్యేక కార్యక్రమంలో కేంద్ర మంత్రి అశ్విని వైష్ణవ్ ఈ నివేదికను ఆవిష్కరించారు. సొంతంగా అడ్వాన్స్‌డ్ ఏఐ అల్గారిథమ్స్ అభివృద్ధి చేయాల్సిన అవసరం లేకుండానే, అందుబాటులో ఉన్న సాంకేతికతలతోనే అభివృద్ధి చెందుతున్న దేశాలు ప్రయోజనం పొందవచ్చని ఈ రిపోర్ట్ స్పష్టం చేసింది. నిపుణుల కొరత ఉన్న చోట రోగ నిర్ధారణ, వాతావరణ సమాచారం, బోధన వంటి రంగాల్లో ఏఐ అసిస్టెంట్‌లా తోడ్పడుతుందని తెలిపింది. అయితే, డిజిటల్ అంతరం, సైబర్ భద్రత లేమి, విద్యుత్ మరియు ఇంటర్నెట్ సౌకర్యాల కొరత వంటి సవాళ్లను అధిగమించాలని నివేదిక పేర్కొంది. సాంకేతికతను అందరికీ చేరువ చేసేందుకు ‘స్మాల్ ఏఐ’ అప్లికేషన్లు ఎంతో ఉపయోగపడతాయని తెలిపింది. సమగ్ర శిక్షణ, సరైన నిబంధనల ద్వారానే ఏఐ ఫలాలను పూర్తిగా అందుకోగలమని ప్రపంచ బ్యాంక్ ముగించింది.
అభివృద్ధికి ‘ఏఐ’ బాట: ప్రపంచ బ్యాంక్ ‘వరల్డ్ డెవలప్‌మెంట్ రిపోర్ట్ 2026’ విడుదల!
